ОХУ тав дахь хөгжлийн үеийн Су-57 тийрэлтэт сөнөөгч онгоцоо экспортод гаргахаар төлөвлөж байгаа аж, эхний ээлжид Оросын зэвсэгт хүчний захиалга биелсний дараагаар экспортлох бөгөөд энэ хугацаанд гадаад улсуудын эрэлт огцом өсөх магадлалтай гэж Ростек нисэхийн цогцолборын аж үйлдвэрийн захирал Анатолий Сердюков хэллээ.

"Бид өөрсдийнхөө армид хангалттай тооны сөнөөгч онгоц нийлүүлэх хүртэл томоохон эрэлт хэрэгцээ үүсэх магадлал юм. Тиймээс, манай номер нэг зорилго бол Оросын зэвсэгт хүчнийг хангах явдал юм. Үүний зэрэгцээгээр бид энэ сөнөөгч онгоцоо гадаадынханд санал болгож байна мөн бид зар сурталчилгааны кампанит ажлаа явуулж байна" гэж Сердюков хэлэхдээ яг ямар улс орнууд худалдан авагч болохыг тодорхой хэлээгүй байна.

2019 оны 5-р сард ОХУ-ын Ерөнхийлөгч В.Путин Су-57 сөнөөгч онгоцыг 2028 он хүртэл Зэвсэгт хүчиндээ худалдаж авна гэж уулзалтын үеэр мэдэгдсэн юм.

ОХУ-ын Цэргийн-техникийн хамтын ажиллагааны албаны төлөөлөгч Мария Воробьева хэд хэдэн улс Су-57 онгоц худалдаж авах тухай албан ёсны өргөдлөө илгээсэн тухай өмнө нь мэдээлж байсан бөгөөд уг сөнөөгч онгоцыг сурталчлах ажил хэрэгтэй болж байна гэсэн байна.

Су-57 онгоц нь агаар, газар, усан дахь бүх төрлийн байг устгахад чадвартай юм. Онгоц нь дуунаас хурдан нисэх хурд, өөрийн үндсэн дотоод зэвсгийн агуулах хэсэгтэй, радио шингээгч бүрхүүл, хамгийн сүүлийн үеийн тоног төхөөрөмжтэй. Энэ сөнөөгч онгоцны үйлдвэрийн нэгж үнэ нь ойролцоогоор 40 сая орчим Америк доллар юм байна.